Gelmişem Sana/ Ümmi Sinan

Pirüm 'azîzüm bâ-safâ seyrâna gelmişem saña
Mazhar-ı zât-ı Mustafâ sultâna gelmişem saña

Ey küntü kenziñ mazharı tâlib-i hakkıñ rehberi
Ey mürşidleriñ serveri ihsâna gelmişem saña

Ey kân-ı 'ilm ü 'irfânım mazhar-ı sırr-ı Sübhânım
İderiseñ kabûl cânım kurbâna gelmişem saña

el-Mü'minûne lâ-yemût hayy ü bekâsın bî-vücûd
Sundum saña elimi tut Lokmâna gelmişem saña

Zâhir tenim bâtın cânım döndüm saña küllî yönüm
Kalmadı zann u gümânım imâna gelmişem saña

Yandı ciger oldı kebâb dilerem ola feth-i bâb
Nûş itmege âb-ı hayât mestâne gelmişem saña

Yüzler sürüben aglayu himmetiñe bel baglayu
Katre oluban çaglayu 'ummâna gelmişem saña

İrgirmege mahbûbına tâlibleri matlûbına
Emrâz-ı kalbiñ bâbına dermâna gelmişem saña

Girdüm bu 'aşk bâzârına komaz bu günüm yarına
Yanmaga derdiñ nârına pervâne gelmişem saña

Ol küntü kenzi bulmaga sırrıña 'ârif olmaga
'İlm-i ledünnî bilmege 'irfâna gelmişem saña

Ben bilmezem ahvâlimi bulmaga togrı yolımı
Bî-çâreyem tut elimi dîvâne gelmişem saña

Bulmaga vasl-ı yârimi kodum nâmûs u ârımı
İrgirmege katârımı kârbâna gelmişem saña

Ümmî Sinân eydür pîrim artdı benüm âh u zârım
Envârı gözler gözlerim sübhâna gelmişem saña

Ümmî Sinan